لمحبين مشروبات الطاقة(Energy drinks) قبل النادي !! انتبهوا!!

بداية ايش هي مشروبات الطاقة (Energy drinks) ؟؟

تُعرَّف مشروبات الطاقة(Energy drinks) على أنها مشروبات تحتوي على مكونات تزيد من الأداء العقلي والطاقة داخل الجسم ، وتحتوي غالبية أنواع هذه المشروبات على مادة الكافيين التي تحفز وظائف المخ ، وتزيد من التركيز والتطبيق ، وكذلك قسم خدمات الحالة العقلية والمواد التي تشير إلى أن المادة المسببة للإدمان (Substance Abuse and Mental Health Services Administration) تشير إلى أن علبة واحدة تحتوي على كمية تتراوح بين 80-500 مجم من الكافيين تدخل مجرى الدم بعد 10 دقائق من تناولها ، مما يرفع الضغط والنبض ويزيد إلى الأعلى. تتراوح مستوياته من 14-45 دقيقة بعد تناوله ، كما يحتوي عدد قليل من تلك المشروبات على مواد نباتية أخرى معروفة بامتلاكها تأثيرًا ملحوظًا ، مثل الجينسنغ والغوارانا.

فهذا الموضوع جدا مهم وخصوصا للي يشربون مشروبات الطاقة(Energy drinks) بشكل اساسي قبل التمرين ولمحبين مشروبات الطاقه قبل النادي بقصد تعطيهم طاقه ومن ذا الكلام،ترى شغلكم من الاخر تيش بريش وحالكم حال الي يشرب ماء بس!

اوووف كيف يعني ؟

دراسه اجريت في كلية علم الحركه في جامعه منسوتا في الولايات المتحده الامريكيه قسموا ١٥ شخص لمجموعتين المجموعه الاولى عطوهم مشروب طاقه (Energy drinks) اسمه مونستر والمجموعه الثانيه عطوهم مشروب نفس طعم مشروب الطاقه بس مافيه محتوياته وخلوهم يتمرنون لمدة نص ساعه, وكان الدراسه عن تأثير مشروب الطاقه على عدد نبضات القلب في وقت الراحه، واثناء التمرين وبعد التمرين

اكتشفوا الاتي عن هذي المشروبات (Energy drinks):

١. المجموعه الاولى (الي شربوا مشروب الطاقه) نبضات قلبهم كانت اعلى اثناء الراحه (قبل التمرين)

٢. المجموعتين نبضات قلبهم نفس الشي اثناء التمرين

٣. المجموعتين نبضات قلبهم نفس الشي بعد التمرين

الخلاصه عن (Energy drinks):

مشروبات الطاقه لا تعطي طاقه ولا توكل خبز ولا تسوي شي,بالعكس راح تتعبك اسرع لان يزيد من عدد نبضات قلبك حتى وانت في فترة الراحه!

يعني اشي ااااه قلبي واشي تغني معلم على الصدعات قلبي ….. لا لا اسحبها ترى جت عفويه

مصدر الدراسه:

http://www.jissn.com/content/11/1/2

تبون طاقه قبل النادي؟

اكل وجبه فيها كاربوهيدرات قبل التمرين بساعتين، واشرب قهوه سوده وانت رايح النادي وهااااات وحشنا هاااااات

ثلاث اشارات من المخ لازم تعرفون معناتها وتنظمون حياتكم الصحيه عليها:

١. الجوع:

اشاره من المخ ان يافلان انا احتاج اكل ولا راح احرق الاحماض الامينيه الي بالعضل عشان يعطيني يطاقه

٢. الشبع:

اشاره من المخ ان يافلان انا اكتفيت بالاكل وكمية الطاقه الي دخلتها واي شي راح تعطيني زياده راح اخزنه كشحم

٣. التعب:

اشاره من المخ ان يافلان انا حرقت مخزون الجلايكوجين (الكاربوهيدرات) الي بالعضل والكبد واي شي راح تسويه زياده راح احرق الشحم عشان يعطيني طاقه اذا ماطفت ٦٥٪ الى ٧٥٪ من قدرة نبضات قلبك في الدقيقه.

طيب كيف تستفيد من هل ثلاث اشارات؟

١. اذا حسيت بالجوع لا تنتظر اكثر من نص ساعه وروح اكل عشان الجسم مايحرق العضل

٢. اذا حسيت بالشبع وقف اكل عشان مايزيد الشحم الي بالجسم

٣. اذا حسيت بالتعب بعد التمرين المقاومه كمل رياضه هوائيه بس نبضات قلبك لازم ما تزيد ٧٥٪ من قدرته عشان تحرق اكبر كمية شحم ممكنه

ملاحظة:

تدرون ان احتماليه انك تخربط بالاكل تكون اعلى اذا كنت تحس بالجوع؟ يعني لا تتذاكى على جسمك بارك الله فيك

رح قل لشخص فاهم الموضوع غلط بغلط عباله الجوع يعني قاعد يحرق شحم والتعب يعني روح نام

رياضة المقاومة والاهتمام بالرقم على الميزان!!

طيب ايش افضل مشروب تشربه قبل التمرين وقبل الوجبة وعالريق ؟؟!!

الي اشربه قبل كل وجبه بنص ساعه وقبل التمرين واول ما اقعد من النوم هو شاي الصيني الاسود oolong tea !! تدرون ليش؟ اقروا بارك الله فيكم:

١. الشاي الصيني الاسود يسرع عملية حرق الاكل وتحويله الى طاقه بسبب الكافين

٢. بسبب احتواء الشاي الصيني الاسواد على اعلى تركيز للمضاد للاكسدة مادة البوليفينول عن باقي الشاي

فأنه يساعد على الاحساس بالشبع لمده اطول! لا وازيدكم من الشعر بيت بسبب البوليفينول يجعل الجسم يفضل استخدام الدهون كطاقه! بعد تبون زيادة ؟ مادة البوليفينول تقلل من افراز الانزيمات الهامضمه للدهون والكاربوهيدرات يعني تمنع امتصاص نسبه قليله منهم! هلا هلا

المهم شوفوا الدراسات عن هذا الشاي الداهيه:

١. دراسة اجريت من جامعة بوزنان في بولند عن تأثير الشاي الصيني والاخضر على اجسام المصارعين, قسموا ٣٠ مصارع الى ثلاث مجموعات المجموعه الاولى عطوهم شاي الصيني والمجموعه الثانيه شاي اخضر والثالثه ماعطوهم شي وكل مجموعة نفس كمية الاكل,بعد ست اسابيع اكتشفوا ان المجموعه الاولى الي شربت شاي الصيني فقدت ٢ كيلو شحم صافي تقريبا، المجموعه الثانيه الي شربت شاي اخضر فقدت كيلو شحم صافي!

مصدر الدراسه:

http://docsdrive.com/pdfs/ansinet/pjn/2010/696-702.pdf

٢. دراسة اجراها دكتور رامبلر على تأثير الشاي على الرجال من حيث كمية الطاقه المبذوله, قسم ١٢ رجل الى اربع مجموعات. الاولى عطاهم شاي صيني، الثاني عطاهم شاي اخضر، الثالثه عطاهم ماء مع كافين والمجموعه الاخير ولا شي، واكتشف الاتي:

اولاً: كمية الطاقه المبذوله اكثر مع مجموعة الشاي الصيني والاخضر بالتساوي

ثانياً: مجموعة الشاي الصيني احرقوا مايقارب ٨٠ سعره حراريه اكثر عن الباقي

ثالثاً: ١٢٪ من الطاقه المبذوله في مجموعه الشاي الصيني كان من الشحم مقارنه مع الباقي!

مصدر الدراسه:

http://m.jn.nutrition.org/content/131/11/2848.long

وين يبيعونه؟ كل محلات الشاي واسمه Oolong Tea

من الاخر,

اتركوا عنكم سوالف مكملات حارق الدهون ومكملات الطاقه ومشروبات الطاقة (Energy drinks) وهذا الحكي فاضي ترى ماوراهم الا الفلس! وصدقوني ان هذا الشاي راح يضعفكم وينشط اجسامكم بطريقه صحيه اذا مارست رياضه وعدلت اكلك اكثر من اي حبوب, الله يرضى عليكم لا تصدقون سالفة في حبوب تضعفكم بدون نظام غذائي ورياضه ترى سالفه عمياء وتفشل واذا اسمعوها العربان اقصد الاجانب كان ماتوا من الكركره. وكل واحد عقله براسه ويعرف خلاصه.