هل لازم اهتم بالسعرات الحرارية لنظامي الغذائي؟!
اخر شي لازم تهتم له هو السعرات الحراريه، ولو ماتشوفه بعد احسن,والي يقول ان اهم شي بالاكل هو السعرات الحراريه او Calorie diet مايشوف شر, اوووب اووب ليش؟
ليش بعد بكيفي لا لا صدق في عدة اسباب راح اقسمهم في عدة مواضيع
Contents
Calorie diet
السبب الاول:
السعره الحراريه الي من البروتين تختلف اختلاف كلي من السعره الحراريه الي من الكاربوهيدرات ومن الدهون! شلون؟
لازم تعرفون الاتي:
كل غرام بروتين فيه اربع سعرات حراريه
وكل غرام كاربوهيدرات فيه اربع سعرات حراريه
كل غرام دهون فيه تسع سعرات حراريه
مثال:
٥ غرام بروتين فيهم ٢٠ سعره حراريه
و٥ غرام كاربوهيدرات فيهم ٢٠ سعره حراريه
وايضا ٥ غرام دهون فيهم ٤٥ سعره حراريه
حلوين؟ نكمل
وكل نوع فيهم الجسم يحتاج طاقه لهضمه , يعني كمية الطاقه اللي يحتاجها الجسم عشان يهضم البروتين غير عن كمية الطاقه اللي يحتاجها لهضم الكاربوهيدرات وايضاً غير عن الدهون
لان اصعب شي يتم هضمه ويحتاج اعلى طاقه هو البروتين وبعدها الكاربوهيدرات واسهل شي الدهون.
كم من الطاقه الي يحتاجها الجسم لهضم كل نوع؟
– الجسم يستخدم ٢٠-٣٥٪ من سعرات البروتين لهضم البروتين
– ويستخدم ٥-١٥٪ من سعرات الكاربوهيدرات لهضم الكاربوهيدرات
– وايضا يستخدم ٠-٥٪ من سعرات الدهون لهضم الدهون
مثال: اذا اكلت ٢٠٠ سعره من البروتين بالواقع انت قاعد تدخل داخل جسمك فقط ١٦٠ سعره لان ٤٠ سعره حراريه تم استخدامها في هضم الاكله.
اما اذا اكلت ٢٠٠ سعره من كاربوهيدرات فانت دخلت داخل جسمك مايقارب ١٩٠ سعره لان ١٠ سعرات حراريه تم استخدامها في هضم الاكله
حلوين؟
اقرا ايضا : ايش هي الرياضة اللي وزنهم زايد لازم يمارسونها عشان اجسامهم ماتترهل؟
يعني لو تاكل ٢٠٠ سعره حراريه من صدر دجاج تختلف اختلاف كلي من اذا اكلت ٢٠٠ سعره حراريه من خبزه يعني الله يرضى عليكم لا تتعقدون وتحسبون سعرات الحراريه لكل شي لان صدقني ماوراها الا عوار الراس وترى خذها مني ٩٥٪ من اغلب اخصائين التغذيه مايشوفون السعرات الحراريه.
طيب ايش اهم اذا انا عندي هوس الارقام ؟ شوف المكونات من بروتين وكاربوهيدرات ودهون
طيب ايش الحل اذا انا مالي خلق لا ارقام ولا هم يحزنون؟
هز كتفك ولا تاكل الا اذا جعت ولا تشبع اذا اكلت ويفضل ان يكون اكلك اما شي ينزرع نفس الخضار والفواكه او من شي ينذبح نفس اللحوم
Calorie diet
السبب الثاني:
كمية السعرات اللي تحرقها اليوم غير عن كمية السعرات اللي حرقتها امس وغير عن كمية السعرات الي راح تحرقها بكرا!
ياجماعه تدرون ان ربكه بسيطه (خوف من موقف) تسرع عملية الايض (عملية حرق السعرات الحراريه)؟
تدرون ان اذا سمعت خبر يفرحك يتسرع عندك عملية الايض؟
وايضا اذا كنت متوتر لفتره طويله تبطىء عندك عملية الايض؟
وتدري اذا نفسيتك تعبانه تبطىء عندك عملية البيض مادري الايض؟
ومستحيل كل يوم راح يصير فيك نفس المواقف! يعني مستحيل كل يوم الساعه خمس العصر مثل قاعده تبكين لان قبل امس وحده سرقت الحمره ومستحيل كل يوم الساعه ٨ الصباح تسوي رقصة الحيه مثل الخبل لان نزل راتبك
اللي اقصده كل يوم راح يكون في تقلبات في سرعة عملية الايض عندك اذا امس انت حارق ١٢٠٠ سعره حراريه، اليوم احتمال تحرق ١٥٠٠ سعره حراريه، وبكرا اذا وصلت لك هدية ساعة رولكس احتمال تحرق ٢٠٠٠ سعره حراريه.
معناتها حسبة السعرات الحراريه مامنها فايده لان اذا اكلت ١٥٠٠ سعره حراريه باليوم اللي انت حرقت ١٢٠٠ راح يزيد وزنك وباليوم اللي حرقت ١٥٠٠ سعره راح يثبت وزنك وباليوم اللي حرقت ٢٠٠٠ سعره راح ينزل وزنك, ففلوها واتركوا عنكم السعرات بارك الله فيكم
على فكره كل الاجهزه اللي تقيس السعرات الحراريه فيهم نسبة عاليه من الخطاء وماتحسبلك بدقه فسالفة ان حتى وانت بعرسك لابس ساعه تقيس سعرات الحراريه مايجوز وماتشوف شر
Calorie diet
السبب الثالث:
مافي ولا دراسه علميه تثبت ان نظام غذائي قليل السعرات يساعد على فقد الدهون اكرر قلت دهون وليس الوزن!
على فكره، اغلب اللي يتبع نظام غذائي يعتمد على السعرات الحراريه تلاقي نظامه اغلبه عباره عن قليل جدا من البروتين والدهون المفيده وكثير من الكاربوهيدرات!
وهذي مصيبه! ليش؟
لان كل خلايا الجسم كلها دون استثناء تحتاج بروتين ودهون لتتكون! يعني اللي يتبع هذا النظام اغلب الوزن اللي راح يفقده هو من عضل، صلابة العظام، وقليل جدا من الدهون ! يعني اخذ جسم مرهرط.
Calorie diet
خذوها مني اي شخص قاعد يضعف وشعره يطيح او اظافره تتكسر او جلده خشن او شكله من منكوبين الزلازل ترا
نظام اكله مافيه بروتين! ياجماعه اذا تعرفون اي شخص فيه عقدة سعرات الحراريه امسك شعره اذا طاح معناته اما ان هو وصخ ومايتسبح او اكله خربوطه ومافيه بروتين ودهون مفيده… خذ فيه اجر وانصحه ان يعدل نفسه , اكرر ٢٠٠ سعره حراريه من صدر دجاج تختلف اختلاف كلي عن ٢٠٠ سعره حراريه من الارز
التعليقات مغلقة، ولكن تركبكس وبينغبكس مفتوحة.